La oposición acusa a Moriyón de ponese "un sobresueldu" y el PSOE y Vox piden la so dimisión

'Floro' insistió en que Xixón "merez" una alcaldesa "honesta y tresparente", non una "que vaya de víctima"

Los grupos municipales de PSOE, IX y Podemos en Xixón acusaron esti miércoles a Carmen Moriyón de facese la "víctima", culpáronla de la "esmoleciente deriva autoritaria" nel Ayuntamientu y de ponese un "sobresueldu" de mil euros mensuales con dineru público, al empar que los socialistes y Vox pidieron la so dimisión.

Moriyón compareció nel plenu a pidimientu de les formaciones pa dar esplicaciones al respective de la sentencia del Tribunal de Cuentes, que condenó a l’alcaldesa a devolver 31.314 euros por facer pagos inxustificaos con cargu a l’asignación del grupu municipal de Foro.

El portavoz del PSOE, Luis Manuel Flórez 'Floro', destacó que l’alcaldesa resultó "condenada como responsable del usu irregular de fondos públicos", polos que recibió "un sobresueldu mensual de 1.000 euros" y usó la "tarxeta VISA de Foro" pa pagar gastos "que nun pudo xustificar".